محكمة الأسرة | نجلاء تطلب الخلع: شايفني فاشلة.. والزوج يرد: متعود على أمي

الطريق 0 تعليق ارسل طباعة تبليغ حذف مشاركة الارباح

"أنا مش ست تافهة، أنا ست محتاجة تسمع كلمة حلوة، محتاجة جوزي يقدرني، كل الناس بيشكروا فيا إلا جوزي دايما بينتقدني"، هكذا بررت الزوجة "نجلاء" دعواها للخلع أمام محكمة بالزنانيرى.

وقالت الزوجة فى دعواها أمام محكمة الأسرة بزنانيرى: "اتجوزت من سنتين، حاولت بقدر الإمكان أهتم بكل حاجة بيحبها، مقصرتش أبدا، كنت بهتم بنفسي عشان دايما أعجبه، وبطريقته فى الأكل والشرب، بس جوزي مبيرضاش، ودايما شايفني مقصرة ".

وتابعت الزوجة أمام محكمة الأسرة بزنانيرى: "الكل بيشكر فى طبيخي، حتي أمي بتشهد إني سرقت منها لقب أحسن أكل فى العيلة، بس جوزي يجي البيت وبعد يوم طويل من التعب والوقوف على رجلي، يقولي ببساطة الأكل ملوش طعم، عمره ماقالي تسلم إيدك، عمره ماقدرني دايما شايفني فاشلة".

وأضافت الزوجة أمام محكمة الأسرة بزنانيرى: "الستات محتاجة كلمة حلوة تحسسها إنها تعبها ليه فايدة، أنا شغالة وبرجع من شغلي أقف فى المطبخ، وضحيت عشانه بتعبي وصحتي، بس فعلا مش أي راجل يقدر قيمة مراته، عشان كده مش قادرة أكمل حياتي معاه بالطريقة دي ".

ورد الزوج على زوجته أمام محكمة الأسرة بالزنانيرى: "إحنا مش ملايكة، إحنا بشر ولازم نغلط، بنتعب ٢٤ ساعة عشانهم، وعشان نوفرلهم عيشة حلوة، بس ضغط الشغل بيخلينا نهملهم أحيانا، أنا عاوز حياني معاها تكمل أنا بحبها، ودلوقتي الخلع سلاح سهل للستات، بيذل الراجل وبيخرب البيوت".

وأضاف الزوج أمام محكمة الأسرة بالزنانيرى: "أنا ٢٨ سنة عايش مع أمي، متعود عليها وعلى أكلها ومن الطبيعي معرفش أتعود على مراتي بسهولة، وأحيانا بغلط معاها من غير قصد، زي ماهي بتغلط برده".

اقرأ أيضا: محكمة الأسرة اليوم 2020| إيناس: جوزي بيتحكم فيا بطريقة بشعة


ولا تزال الدعوى منظورة إلى الآن تنتظر الحكم، لحين الفصل فيها ومراجعة الزوجة لنفسها، حيث إنها تطلب الطلاق وتريد إفتداء نفسها بالمهر.

ملحوظة: مضمون هذا الخبر تم كتابته بواسطة الطريق ولا يعبر عن وجهة نظر مصر اليوم وانما تم نقله بمحتواه كما هو من الطريق ونحن غير مسئولين عن محتوى الخبر والعهدة علي المصدر السابق ذكرة.

أخبار ذات صلة

0 تعليق