عمر الشريف -الله يرحمه- لما كبر وكان بيظهر كتير في برامج عربية كان دايمًا بيكرر كلمة الحظ، كان دايمًا يقول إنه حقق نجح كبير وبقى عالمي بالحظ.. والكلام ده بيعجب ناس كتير مع إنه غير صحيح، أو غير دقيق، لإن الواحد ممكن يكون حظه حلو بس مش ذكي (حمار يعني).. أكيد الحظ لعب دور مع عمر الشريف.. لكن هو لما كان بيصور فيلم “سقوط الإمبراطورية الرومانية”، في الستينيات، اتعمل معاه لقاء تليفزيوني واتكلم عن شغله وازاي بيخطط له وعايز يعمل ايه بالظبط، الحظ لوحده صعب يعمل نجاح.. لازم ذكاء، هو نفسه لما عمل فيلم سقوط الإمبراطورية الرومانية وافق يعمل الدور الصغير ده بعد ما كان عمل لورانس العرب لإنه حسبها بشكل معين، قال مش هينفع كل فيلم أعمله يكون مافيهوش ستات، أنا هنا هطلع جوز صوفيا لورين، لإنه كان عمل لورانس العرب وفيلم تاني مافيهوش بطلة فشاف إن ده مش هيخدم صورته عند الجمهور..