شادية بعد الشهرة كان بيجيى لها جوابات كتير من معجبين أغلبهم كان بيطلب منها الجواز.. لكن من بين كل الجوابات كانت شادية فاكرة جواب واحد مقدرتش تنساه وده لانه فعلا صعب يتنسي..

الجواب جه من بلد من الارياف وكان مكتوب فيه ان اللي باعت الجواب عايز يتجوزها .. ومش عايز يتجوزها لان صوتها حلو .. ولا عايز يتجوزها عشان تمثيلها حلو .. وانما هو عايز يتجوزها لانها هى شادية..

وحاول مرسل الجواب انه يغري شادية بقبول عرضه فكتب لها ان ابوه غنى جدا وثرى ثراء فاحش .. وبما انه الوريث الوحيد فشادية هتعيش معاه فى نعيم عمرها ماشافته .. وطلب فى النهاية انها تبعت له الرد فى اسرع وقت ممكن..

لحد هنا ممكن تشوف الجواب عادي.. عاشق ولهان كتب لنجمة بيحبها جواب.. لكن الملحوظة اللى كتبها العاشق فى نهاية الجواب هى اللى مش عادية وهى اللى خلت شادية تقول ان الجواب ده صعب يتنسي..

العاشق الولهان كتب فى اخر الجواب : ملحوظة : اذا وجدتى اى اخطاء فى الخطاب فهذا يرجع الى أمين افندى فهو الذى كتب الخطاب لانى مازلت فى الصف الثالث الابتدائي ولا اجيد الكتابة مثله.