المذيع كان بيسأل أمينة خليل:
“ايه الدرس اللي اتعلمتيه في رحلة اكتشاف نفسك؟”

ردت عليه وقالتله: “هي جملة بالانجليزي اسمها “less is more” يعني كل ما هو أقل هو أكثر؛ يعني في الشكل مثلا كل ما كان أبسط كل ما كان أحلى وأرقى وافخم، كل ما انت يبقى حواليك ناس قليلة في حياتك كل ما هيبقى فيه خير أكتر والناس هيبقوا بيحبوك بجد مش ناس كتير على الفاضي، كل ما كان كلامك قليل كل ما هيبقى مسموع أكتر .. فَهو المبدأ ده اللي اتعلمته بعد تجارب كتير ماجاش بالساهل”.

والحقيقة إن القناعة بالمبدأ ده مُريحة جدا وهتوفر عليك تعب كتير، لما تقتنع إن “قلة صادقة خير من كثرة مزيفة”
لما يبقى حواليك ناس قليلة لكن محبتهم حقيقية، ولما تتكلم كلمتين تقول فيهم المفيد، ولما تكون بسيط في شكلك واسلوبك وتعاملاتك بس نفس الوقت راقي..
البساطة في كل حاجه طول الوقت أحسن من الدوشة واللمة الكدابة.