هو ايه اللي يخلي حكومة كاملة وشركات اجنبية كبار يقعدوا على ترابيزة واحدة ويتفقوا على حفر 26 بير لاستكشاف البترول مرة واحدة؟ وليه الربع الاول من 2026 بالذات هيبقى نقطة تحول في خريطة الطاقة في مصر؟ وازاي خطة بالشكل ده ممكن تغير مستقبل اكتشافات البترول والغاز في البلد وترجع مصر تاني لمستوى انتاج اعلى من اللي هي عليه دلوقتي؟
الحكاية بدأت مع اعلان وزارة البترول والثروة المعدنية عن اتفاقها مع مجموعة من الشركات الاجنبية الكبرى على تنفيذ برنامج حفر ضخم يشمل ستة وعشرين بير استكشافي للنفط والغاز الطبيعي
عمليات الحفر هتبدأ من يناير الجاي وده بالتوازي مع اعمال التنمية اللي الشركات شغالة عليها في الابار القائمة حاليا
الاتفاق تم بعد مراجعات مستمرة بين الهيئة المصرية العامة للبترول والشركة القابضة للغازات الطبيعية ايجاس لضبط خطة الانتاج والتنقيب اللي البلد محتاجاها في المرحلة دي.
المفاجأة كانت ان الصحراء الغربية حصلت على اكبر نصيب من الخطة.. ودي المنطقة اللي طول عمرها تعتبر مخزن ثروات لسه بيطلع خير
وهناك تم اعتماد حفر ستاشر بير استكشافي للنفط خلال الفترة من يناير لحد مارس2026.. وكمان 3 ابار جديدة في خليج السويس علشان يعززوا انتاج المناطق اللي كانت شغالة من سنين ولسه عندها فرصة اكبر للعطاء.
الاهتمام مش واقف على البترول بس.. الحكومة مركزة بشكل ضخم على الغاز الطبيعي وده واضح من تجهيز حفر خمس آبار استكشافية في المياه العميقة بالبحر المتوسط.. غير بيرين في دلتا النيل واللي الهدف منهم الوصول لحقول غاز جديدة ونقلها على خريطة الانتاج قبل نهاية السنة المالية.. وده مع الاستفادة من البنية التحتية الجاهزة في غرب دلتا النيل والبحر المتوسط اللي تعتبر ميزة تنافسية لمصر في مجال الغاز.
وفي اجتماع مهم ضم مسؤولي الوزارة وشركات الانتاج اتفقوا على تنفيذ خطة تحفيز للابار اللي شغالة دلوقتي.. الخطة دي معتمدة على استخدام كيماويات خاصة وعمليات حقن وانظمة حفر اعمق لرفع انتاجية الآبار بحوالي خمستاشر في المية..و هتتطبق على حقول البترول والغاز سواء برية او بحرية خلال النصف التاني من سنة 2025/2026 .. والهدف الرئيسي رفع انتاج البلاد وتقليل فاتورة الاستيراد قبل نهاية العام المالي.
مصر دلوقتي بتنتج حوالي 35 الف برميل نفط يوميا بالاضافة لـ 4.2 مليار قدم مكعبة غاز وده بيغطي من 65 لـ 70% من احتياجات السوق المحلي
وعلشان تزود النسبة دي لازم تستغل كل فرصة متاحة للتنقيب وتقليل المخاطر وده اللي بتشتغل عليه ايجاس مع الشركاء الاجانب من خلال نتائج المسح السيزمي اللي اتعمل في امتيازات دلتا النيل والبحرين الاحمر والمتوسط.
ولسه الاسبوع اللي فات وزارة البترول اعلنت نجاح شركة الوسطاني للبترول في حفر بئر شمال البسنت واحد في الدلتا كاكتشاف غازي جديد
الاختبارات الاولية قالت ان المخزون المضاف ما بين خمستاشر لخمسة وعشرين مليار قدم مكعبة.
والاكتشاف ده جاي ضمن البرنامج الاستثماري لشركة دانة غاز الاماراتية بالتعاون مع ايجاس في مناطق امتيازها بالدلتا واللي بيشمل حفر حداشر بير جديدة للكشف عن مزيد من موارد الغاز.
مصر هدفها انها توصل بانتاج الغاز لنحو ستة فاصل ستة مليار قدم مكعبة يوميا بحلول الفين سبعة وعشرين وترجع تاني لمرحلة الاكتفاء الذاتي.
وكل خطوة بتنحفر تحت الارض النهاردة بتقرب البلد من الهدف ده خطوة وراء خطوة.
المصدر: بانكير
ملحوظة: مضمون هذا الخبر تم كتابته بواسطة بوابة المصريين في الكويت ولا يعبر عن وجهة نظر مصر اليوم وانما تم نقله بمحتواه كما هو من بوابة المصريين في الكويت ونحن غير مسئولين عن محتوى الخبر والعهدة علي المصدر السابق ذكرة.
