كتبت ياسمين يحيى

شهدت الأيام الماضية أزمة داخل نادى الزمالك بعد تقدم محمد أشرف روقا لاعب الفريق السابق بشكوى ضد النادى لدى اتحاد الكرة، للمطالبة بمستحقاته المتأخرة، على خلفية فسخ العقد مع اللاعب بشكل منفرد.

وكشف مصدر مقرب من لاعب الزمالك السابق، خلال الساعات الماضية أن محمد أشرف روقا لم يتقدم بشكوى لدى الاتحاد الدولى لكرة القدم فيفا، ولم يصعد الأمر، بل الشكوى الآن لدى لجنة شئون اللاعبين باتحاد الكرة.

وخرج روقا في تصريحات تليفزيونية ليكشف أنه تعرض للظلم في الزمالك، فبعد تجديد العقد، تفاجأ ببند لم يتم الاتفاق عليه ووقتها قال له عبد الواحد السيد مدير الكرة: "مش عايزك تزعل لأنك ممشتش كورة إنت اتاخدت كبش فداء".

ولم تقف الأزمة عند هذا الحد، بل أن التصريحات التي خرج بها عبد الواحد السيد مدير الكرة السابق بالزمالك وأيمن عبد العزيز المدرب السابق ردا على روقا أشعلت الأزمة أكثر مما هي عليه ، حيث قال عبد الوحد السيد أن روقا رحل عن الفريق بقرار فنى من البرتغالي جوزيه جوميز، وتم إبلاغه بذلك.

فيما قال أيمن عبد العزيز لروقا: "النادي خيره عليك ولعبت 7 سنين خدت مستحقاتك خلال 6 سنين بشكل طبيعي إيه المشكلة لما تصبر على النادي في مستحقات سنة واحدة، وبعدين طالع تتكلم تقول مياه ومش عارف إيه يا أخي احترم النادي اللي خيره عليك وجابك من لا شيء عمل منك لاعب مشهور ومعروف".

روقا لم يكتفى بالصمت بل نشر عبر صفحته على إنستجرام قائلا: أول مرة أكتب حاجة وأعلق على موضوع أنا قلته أو أرد على حد وأذكره باسمه، وهنا كلامي لكابتن عبد الواحد السيد، حضرتك عارف إني بحبك إزاي وبحترمك إزاي، وده البند اللي في عقدي واللي حضرتك قلت إنه مش موجود أو البند ميخصش الفسخ من طرف واحد.

وأضاف: وحضرتك بتقول المفترض إني شخص متربي، لا هو ده مش مفترض، أنا الحمد لله متربي ومتربي كويس جدًا، ومش مستني حد يقول ده متربي ولا لأ، وحضرتك عارف إني مليش في الكدب والتحوير.

وواصل روقا: أما الشخص التاني فهو كابتن أيمن عبد العزيز، حضرتك بتقول إني لما جيت لنادي الزمالك جيت النادي من لا شيء، أنا مش مشكلتي إن حضرتك متعرفش حاجة، أنا قبل ما أجي نادي الزمالك الحمد لله أنا معدي الـ100 ماتش، ربنا كرمني ولعبت منتخب أولمبي مع كابتن حسام البدري، ربنا كرمني روحت منتخب مصر مع كوبر، فأنا الحمد لله مروحتش نادي الزمالك من لا شيء.

وواصل: تاني حاجة أنا مبقدمش حجج زي ما بتقول مليش في الجو ده خالص، وأنت عارف أنا مين وابن مين، وأنا مش مستني إني أشوف الناس بتهاجم حد عشان أطلع أتكلم، أنت بتقول إني خدت فلوس 6 سنين مجتش من سنة، لا هو حضرتك متعرفش حاجة برده وبتتكلم بس، ومتعرفش إني كنت بقعد فترة بـ 5 و6 شهور ميدخلش بيتي جنيه.

واختتم: أما بالنسبة لحوار جوميز فأنا مش محتاج أتحجج، ربنا بس وحده اللي يعلم إذا كنت بكدب أو صادق، فأنت متطلعش تقول أي كلام فارغ عني وأنت متعرفش حاجة، وركز في شغلك بدل ما أنت كل فرقة بتمسكها بتفشل، وبعد كده تمشي.

يذكر أن عقد روقا مع الزمالك كان ممتدًا لثلاثة مواسم، وفسخ التعاقد من جانب نادي الزمالك جاء بشكل منفرد، وهو ما دفع اللاعب للتقدم بالشكوى للحفاظ على حقوقه.