البنك التجاري الدولي CIB قرر يغير قواعد اللعبة ويطرح شهادة ادخار جديدة باسم “شهادة الذهب”.

الشهادة دي مش بس بتديك فايدة ثابتة، لا دي كمان بتدخلك سحب شهري على جوائز ذهبية، في خطوة ذكية من البنك عشان يجذب الناس اللي بتدور على استثمار آمن ومربح في نفس الوقت.

الدكتور خالد الشافعي، الخبير الاقتصادي، شايف إن الشهادة دي “منتج مصرفي ذكي” جداً، لأنها بتخاطب الناس اللي عاوزة دخل شهري ثابت وفي نفس الوقت عندهم طموح يكسبوا جايزة كبيرة.

طيب إيه اللي هتاخده من “شهادة الذهب”؟

أول حاجة هتاخد فايدة 5% بتتصرف لك كل شهر بانتظام طول مدة الشهادة اللي هي 3 سنين.

وكل شهر فيه سحب تحت إشراف وزارة التضامن الاجتماعي على سبيكة ذهب عيار 24 وزنها كيلو، وكمان فيه 50 جنيه ذهب عيار 21 بيتوزعوا على الفائزين.

البنك هيختار 51 فائز كل شهر لمدة 36 شهر، يعني فرص الربح كبيرة جداً.

طيب هل في تفاصيل أو شروط معينة يعني.. هقولك يا سيدي.

أولا لازم تبقى عارف أن الشهادة متاحة من أول يناير 2026.. وتقدر تفتح الشهادة بـ 20 ألف جنيه بس، ومفيش حد أقصى.

طيب إزاي تزود فرصك في المكسب؟ بص.. الـ 20 ألف جنيه بيدوك “فرصتين” في السحب، وكل 10 آلاف جنيه زيادة فوقهم بيدوك “فرصة إضافية”، يعني كل ما تدخر أكتر، فرصك في السبيكة بتزيد.

ولو احتجت فلوس فجأة، البنك بيسمح لك تاخد قرض أو تسهيلات بضمان الشهادة لحد 95% من قيمتها، عشان ماتضطرش تكسرها وتخسر الفوايد وفرص السحب.

على فكرة.. ربط الشهادة بالذهب هو “سر الخلطة”، لأن المصريين دايماً بيثقوا في الذهب كملاذ آمن، والشهادة دي جمعت بين بريق الذهب وأمان البنوك.. وده اللي أكد عليه الدكتور خالد الشافعي في كلامه عن الشهادة دي.