كتب : بهاء حجازي
تعالى اصدمك في احمد خليل

في البداية اتجوز الفنان احمد خليل من الفنانة سهير البابلي، لكن الزواج مدامش كتير وانفصلوا يا دوب سنتين.. وقرر أنه مش هيتجوز تاني.. حصلتله عقدة من الجواز.. لحد ما قابل هايدي الألمانية.

وبيقول عن مراته: “شقيقي استضاف إحدى الفتيات الألمان في منزله لزيارة مصر، والزيارة كان مقررًا لها 10 أيام لكنها امتدت لـ3 شهور، وتعرفت أمي عليها وعرفتني بها كي أتزوجها رغم رفضي لفكرة الزواج في البداية، لكني بعدما رأيتها في منزلنا في أحد المرات أعجبت بها وتزوجنا بسرعة”.

وطلبت من أسرتي عدم تعليم زوجتي للغة العربية حتى تستمر الحياة بيننا، مش عارف ليه يعني.. بيكمل: “لكنهم علموها اللغة واستمرت الحياة بيننا، وأنا لم أر شخصا في حياتي يعشق مصر مثلها، كنت أستيقظ على صوت (هايدي) زوجتي وهي تتشاجر مع طفلتي قبل ذهابها للحضانة، وتقول لها: “بابا قال متنزلوش إلا لما تصلوا”.

الالمان صارمين جدا، لذلك احمد خليل كان بيقول عليه: “الست الألمانية مشتني على العجين مالخبطتوش”. ومراته أسلمت وخلفتله بناته.. ومنهم بنته عليا.. اللي نشرلها صورة قبل وفاته من حفل تخرجها من الجامعة الامريكية ..

اذكر اني شفتله لقاء في برنامج الست دي أمي، وامه كانت نسخة طبق الاصل منه، مش ممكن على التشابة يكاد يكون متطابق.

وخد بالك من اللي جاي، بعد وفاته، نشرت إحدى السيدات، بوست بتحكي موقف إنساني لاحمد خليل، والست قالت: “من ٧ سنين نزلت بوست عن حالة طالب ثانوية عامة متفوق يتيم وحلمه يدخل طب، وكان غرضنا نلاقي كفالة طالب علم له، وبعدها بساعه لقيت مكالمة من حد قالي انا اسمى احمد عبد الله والولد ده مبقاش يتيم ربنا بعتله أب، ممكن توصلينى بيه، وبعدها بيومين الولد كلمنى قالي انا قابلت الاستاذ أحمد خليل وقالي كل اللى عاوزه من عنيا وانا ابوك، احمد خليل مين يا بنى. اسمه احمد عبد الله، قالي لا ده احمد خليل الممثل”.

فالست رجعت كلمت أحمد عبد الله تاني، فقال لها: “انا مكنتش عايزك تعرفي شخصيتي، وكلنا عباد الله أنا عاوز العمل ده يبقى خبيئة يمكن ده يكون طريقي للجنة”.
الله يرحمه، فنان هادي ومحترم .. مالوش لا في الشو ولا في الخناقات … مش هتلاقيله مرة تصريح نص كوم ولا خناقة مع فنانة .. ولا اي حاجة يخجل منها…

الله يرحمه..