متابعة بتجــرد: عبّر الفنان محمد هنيدي عن رأيه الصريح في أزمة “مشاهير تيك توك” التي أثارت جدلاً واسعًا في مصر خلال الأيام الأخيرة، بعد توقيف عدد منهم بتهم تتعلق بالمحتوى غير الأخلاقي والإخلال بالآداب العامة. وجاء تعليق هنيدي خلال رده على بث مباشر للإعلامي محمود سعد، حيث كتب في منشور: “محمود حبيبي، المشكلة مش الذوق العام ولا فكرة تدخل الدولة، المشكلة أعمق بكتير، وهي إن نوع معين من المحتوى الشعبوي، اللي فيه شتيمة وإيحاءات جنسية، بقى بيعجب شرائح كبيرة جدًا من الناس”. وأضاف: “حتى إحنا ممكن نقف ونتفرج من باب الفضول، الناس دي بقت مصدر جذب أكتر من السينما والتليفزيون، ومع كل لايك ومشاهدة، ناس تانية بتسيب شغلها وتقول أنا كمان هعمل ده… في الأول بيبدأ لايف بسيط، لكن مع الوقت وقلة الفلوس، بيبدأوا يزودوا الانحدار علشان المشاهدات، والكارثة؟ إن الجمهور موجود ومتابع”. الشهرة والوعي الجمعي في خطر وتحدّث هنيدي عن تأثير “تيك توك” في تشكيل مفاهيم النجاح عند الجيل الجديد، قائلاً: “تيك توك بقى المنصة الأولى في الشرق الأوسط ومصر، ولو نزلت مول هتلاقي 70% من الناس عارفين التيكتوكرز واحد واحد… بقوا نجوم بيعملوا إعلانات وبيتكرموا، وبيتواجدوا في كل مهرجان، النتيجة؟ إن العقل الجمعي للمجتمع بيتغيّر”. وتابع: “الجيل الجديد شايف إن ده هو النجاح، وناس كتير بقت محبطة، في واحد بيشقى 12 ساعة في شغله، والتاني بيشتم أهله ويقول لفظ خارج، ويكسب 10 أضعافه”. تحذير من خطر حقيقي وختم هنيدي تعليقه برسالة واضحة: “أنا مش مع المنع، بس صعب ننفي إن في خلل كبير، بيمسّ العقول والوعي وشكل المجتمع… التأثير بقى حقيقي وخطير جدًا على أجيال كاملة”. كلمات محمد هنيدي حصدت تفاعلًا واسعًا بين المتابعين، واعتبرها البعض صوتًا فنيًا عقلانيًا وسط الفوضى الرقمية المتزايدة.
