الكلام عن إقالة كولر رغم تخاريفه الأخيرة وختامها في مهزلة ماتش الزمالك امبارح كلام فارغ لا يصدر عن عاقلين، ولا أحترم هذه المصادر أو حتى بحب أعلق عليها, لأن إقالة كولر في الوقت ده مستحيل رغم كل البلاوي..

1- مش هقول لك جايب كام بطولة علشان إحنا مش هنعيش على الماضي حتى لو كانت آخر بطولة جابها من ربع ساعة، أنا دايمًا محتاج البطولة اللي جاية أو اللي مكسبتهاش، مش البطولة اللي خلاص دخلت الدولاب عندي.. لكن هقول لك مفيش مدرب هيعرف الفرقة دلوقتي ويقدر يكمل في الوقت الحرج ده وإنت داخل على مواجهة نارية في نُص النهائي الأفريقي وبإذن الله النهائي..

2- كولر عنده أخطاء ساذجة وعبيطة ولا يمكن احتمالها لكن لا ننسى إنه برضو عمل شغل كويس في كتير من الأوقات، يعني هو ممكن يصلح نفسه ومساره ومسار الفريق معاه، وبسرعة يعني خلال أيام وياريت خلال ساعات، مش خلال أسابيع ولا أشهر طبعًا في حالة إننا مشيناه وجبنا واحد غيره..

3- الخواجة لا يتحمل لوحده المهازل دي.. خصوصًا وإنك كإدارة أكبر نادي في أفريقيا والشرق الأوسط مش عارف بقالك سنين تشتري مهاجم نضيف عليه القيمة، وحققت فشل تاريخي غير مسبوق في عالم كرة القدم من أيام ما كانت الكورة مربعة لحد النهارده، وده على سبيل المثال لعدم دعم المدرب أو الفريق، وعندك أمثلة تانية زي المناخوليا بتاع المنتخب اللي عاوز يجمد الدوري العام ويعمل معسكر 17 سنة للمنتخب بعيد عن الأجندة الدولية أو مصلحة اللاعيبة، والإدارة ملهاش موقف واضح وغالبًا مش هيكون ليها، زيه زي ملف التحكيم الفاسد كده، وزي ملف حراسة المرمى وصفقة أبو جبل مثلاً اللي باظت بسبب التلاعب بالإدارة من جانب آخرين (بصرف النظر عن أهميتها أو ضرورتها)..

4-  كولر وقع كذا مرَّة قبل كده وقام تاني، وده يخلينا عندنا عشم إنه يكمل المرَّة دي، وبلاش ننسى إن استمراره إجباري يعني لازم نستحمله لأن التغيير دلوقتي قاتل..

5- في حالة وجود أسباب قهرية وعاجلة ومميتة ومقنعة من هنا لحد كوكب أورانوس تخلينا لازم نمشي كولر الدقيقة دي قبل الدقيقة اللي جاية، فالإدارة مستحيل تاخُد قرار مصيري وعاجل بالسرعة المناسبة، وبالتالي لو هو لاااازم يمشي دلوقتي في اللحظة دي، فأكيد القرار مش هيطلع غير بعد شهرين تلاتة قول سنتين أربعة..

فخلاصة الكلام كولر مش ماشي ومينفعش يمشي، ولو كل مدرب خرف له تخريفتين مشيناه من النادي فالمدربين كلهم هيباتوا في الشارع يعني..