تخيل معايا كده إن مصر بدل ما تكون بس مجرد طريق عبور للبضايع .. تكون مصنع كبير للعالم كله .. ومين اللي عايز يعمل ده؟ .. أمريكا .. والصين .. وروسيا وغيرهم من الدول الكبرى.
طب ليه كل القوى العظمى دي عايزة تعمل مناطق اقتصادية عندها في مصر؟ .. وإيه حكاية المنطقة الصناعية الأمريكية اللي الرئيس السيسي طالب بيها في المنطقة الاقتصادية لقناة السويس ؟ وليه ده مهم أوي للاقتصاد المصري؟ أسئلة كتير ممكن تكون بتدور في بالك .. وهنجاوب عليها النهاردة بالتفصيل الممل من غير لف ولا دوران.
فى البداية كده ليه السيسي بيطالب الأمريكان دلوقتي باقة منطقة اقتصادية فى المنطقة الاقتصادية لقناة السويس؟
من ساعات.. الرئيس عبد الفتاح السيسي كان بيتكلم مع سوزان كلارك رئيسة غرفة التجارة الأمريكية.. ومع جون كريسمان رئيس مجلس الأعمال الأمريكي المصري .. وأكد الرئيس بوضوح إن مصر مستعدة تستقبل وتوفر كل التسهيلات للمستثمرين الأمريكان اللي عايزين ييجوا يعملوا مصانع في مصر.. وده كلام مش جديد.. بس اللي جديد هو إصرار السيسي وتأكيده على تطلع مصر لإنشاء منطقة صناعية أمريكية متكاملة جوه المنطقة الاقتصادية لقناة السويس.
ليه الإصرار ده دلوقتي؟
ببساطة .. مصر بتتحرك بخطوات ثابتة عشان تتحول لمركز صناعي ولوجستي عالمي .. وموضوع المنطقة الاقتصادية لقناة السويس ده .. هو مفتاح اللعبة كلها.. المنطقة دي مش مجرد حتة أرض جنب القناة .. لأ دي مشروع دولة متكامل .. بيضم موانئ ومناطق صناعية ومراكز لوجستية عالمية.
إيه أهمية المنطقة دي لمصر؟
لما أمريكا تعمل منطقة صناعية عندها في مصر .. ده معناه حاجات كتير أوي أهمها جذب استثمارات ضخمة .. الشركات الأمريكية العملاقة لما تيجي تستثمر .. مش بتيجي لوحدها .. بتجيب معاها تكنولوجيا وخبرات ورؤوس أموال بالمليارات .. وده بيعمل نقلة نوعية للاقتصاد المصري.
كمان ده هيعمل على خلق فرص عمل بالآلاف .. المصانع دي بتحتاج عمالة .. مهندسين .. فنيين .. إداريين .. وده بيساعد في حل مشكلة البطالة بشكل كبير .. وبيوفر دخل ثابت للآلاف من الأسر المصرية.
حاجةكمان مهمة وهي نقل التكنولوجيا والخبرات .. الصناعات الأمريكية معروفة بالجودة العالية والتكنولوجيا المتطورة .. لما المصانع دي تبقى موجودة عندنا .. ده بيخلينا نتعلم ونكتسب خبرات جديدة .. وده بيرفع من كفاءة الصناعة المصرية بشكل عام.
ده غير زيادة الصادرات المصرية .. لأن المنتج اللي هيتصنع في المنطقة دي .. هيتصدر للعالم كله .. وده بيزود حصيلة مصر من العملة الصعبة .. وده طبعاً مهم جداً لاستقرار سعر الصرف ولتحسين الوضع الاقتصادي العام.
ليه القوى العظمى مركزة على لمصر؟
مش بس أمريكا اللي مهتمة .. الصين وروسيا ودول تانية كتير .. كلهم بيجروا عشان يعملوا مناطق اقتصادية عندهم في المنطقة الاقتصادية لقناة السويس .. ليه؟ .. الإجابة بسيطة .. الموقع الجغرافي الفريد لمصر.
قناة السويس مش مجرد ممر مائي .. دي شريان التجارة العالمية .. اللي بيختصر المسافات .. وبيقلل تكلفة النقل .. لما تعمل مصنعك جنب القناة .. ده بيوفر عليك فلوس كتير أوي في الشحن والتصدير .. يعني من الاخر كده .. مصر هي أحسن مكان عشان توصل لأسواق الشرق الأوسط وأفريقيا وأوروبا كمان.
كمان .. مصر سوق كبير .. عدد سكانها بيعدي الـ 100 مليون نسمة .. وده بيخليها سوق استهلاكي ضخم للمنتجات .. أي شركة عالمية بتبص على حجم السوق اللي هتبيع فيه منتجاتها.
ملحوظة: مضمون هذا الخبر تم كتابته بواسطة بوابة المصريين في الكويت ولا يعبر عن وجهة نظر مصر اليوم وانما تم نقله بمحتواه كما هو من بوابة المصريين في الكويت ونحن غير مسئولين عن محتوى الخبر والعهدة علي المصدر السابق ذكرة.
