تفتكر ممكن تقدر تبدأ مشروع بـ5 الاف جنيه بس؟ طب لو قلتلك إن فيه بنت بدأت كده.. وبقت بتكسب أكتر من 11 مليون و600 ألف جنيه في السنة.. من خلال الموبايل بتاعها هتصدق؟
القصة دي بدأت من ولاية أوريجون في أمريكا.. وبطلتها اسمها كيلي روكلين.. كانت شغالة في التسويق وكانت بتقبض كويس جدًا.. لحد ما في أغسطس 2023 فقدت شغلها فجأة بس بدل ما تنهار أو تدور على وظيفة تانية.. كيلي قررت تدي فرصة لحاجة كانت بتحبها من زمان: إنتاج الفيديوهات اللي اسمها UGC.
يعني إيه UGC؟
UGC اختصار لـ User Generated Content.. يعني محتوى بيعمله المستخدم بنفسه للمنتجات والخدمات.. زي الفيديوهات اللي بنشوفها على تيك توك أو إنستجرام وناس عادية بتجرب منتج وتقول رأيها فيه.
الفرق بينه وبين شغل الإنفلونسرز.. إنك مش محتاج متابعين بالملايين .. كل اللي محتاجه إنك تكون بتعرف تصور.. تمنتج.. وتكتب سكريبت بسيط يوصل المعلومة.
كيلي بدأت تعمل فيديوهات وهي في البيت.. 15 ساعة بس في الأسبوع.. تصور.. تمنتج.. تبعت للشركات وبدأت تكسب.. مش بس تكسب.. دي في 2022 كانت بتعمل 142 ألف دولار وفي 2024.. وصلت دخلها لـ233 ألف دولار.. 95% منهم صافي ربح.
واحد هيقول اكيد عشان تكسب الرقم ده بدأت برأس مال كبير؟
المفاجأة.. لا خالص البنت بدأت بـ100 دولار بس.. موبايل بكاميرا كويسة.. مايك صغير بـ20 دولار.. رينج لايت بـ30 دولار.. وترايبود بسيط يعني لا كاميرا بروفيشنال.. ولا استوديو.. ولا معدات معقدة.. بس الأهم من العدة هو الشغل.. والالتزام.. والمحتوى الحقيقي اللي بيفيد الشركات.
وعشان تعرف أهمية الموضوع ده .. سوق الـUGC وصل لـ7.6 مليار دولار في 2024.. والشركات بدأت تميل أكتر للمحتوى ده لأنه أرخص من المؤثرين..
يعني بدل ما يدفعوا آلاف الدولارات لحد عنده متابعين كتير.. ممكن يدفعوا لك 500 لـ750 دولار على فيديو مدته 15 ثانية.. من غير ما تنزله عندك أصلاً
كيلي دلوقتي فتحت شركة اسمها “UGC Pro”.. بتساعد فيها ناس تانية يبدأوا.. وبتنصحك إنك تتعلم كتابة سكريبت كويس.. تتعلم تفاوض مع الشركات.. وتعرف تصور بشكل احترافي حتى لو بالإمكانيات البسيطة.. وآه.. المجال بدأ يسخن.. والمنافسة بتزيد.. بس طول ما انت بتقدم قيمة حقيقية للبراندات.. انت في أمان.
فلو بتدور على بداية.. وعندك وقت فراغ.. وبتحب التصوير أو عندك حتى شوية إبداع.. ابدأ بـ100 دولار.. وابني بيزنس في مجال محتاجين له ناس كل يوم وممكن بعد شهور تلاقي نفسك بتكسب أضعاف اللي كنت بتحلم بيه.. من بيتك.. ومن موبايلك.
المصدر: بانكير
ملحوظة: مضمون هذا الخبر تم كتابته بواسطة بوابة المصريين في الكويت ولا يعبر عن وجهة نظر مصر اليوم وانما تم نقله بمحتواه كما هو من بوابة المصريين في الكويت ونحن غير مسئولين عن محتوى الخبر والعهدة علي المصدر السابق ذكرة.
