كلام كتير اتقال علي الاثر الكبير اللي عملته تحويلات المصريين العاملين بالخارج في مساندة الاقتصاد المصري… ياتري ازاي تحويلات المصريين بالخارج ساندت الاقتصاد المصري.. واية اللي عملته في الاقتصاد المصري..
قالوا زمان المصري معروف بقوته وجبروته، وإنه شعب فرعوني مش بيقبل بالكسر، وده اللي عمله المصريين العاملين بالخارج واللي لما البلد احتاجتهم كان في الميعاد وايراداتهم وتحويلاتهم سندت مصر في أهم أزمة عدت عليا وهيا أزمة نقص العملات الأجنبية في البنوك، وده جه بعد القرار الأصعب اللي أخذه البنك المركزي بتحرير سعر صرف الجنية المصري بشكل مرن قدام الدولار الأمريكي.
طيب اية اللي عملته تحويلات المصريين العاملين بالخارج في الاقتصاد المصري؟.
في 2024، مصر استقبلت أكبر زيادة سنوية في تحويلات المصريين العاملين بالخارج بنسبة 51.3%، وسجلنا 29.6 مليار دولار مقارنة بـ19.5 مليار دولار في 2023 ، وخلال 12 شهر لحد نهاية فبراير 2025، تحويلات المصريين العاملين بالخارج سجلت رقم قياسي بالوصول لـ32.6 مليار دولار، بارتفاع وصل لأكثر من 72.4% عن السنة اللي فاتت.
في أول 7 شهور من السنة المالية 2024/2025 في الفترة من يوليو لحد شهر يناير، التحويلات ارتفعت بنسبة 81% وسجلت ما يقرب من 20 مليار دولار، مقابل 11 مليار في الفترة نفسها من السنة اللي فاتت.
الارتفاع الضخم اللي حصل في تحويلات المصريين بالخارج ساهم في تضييق عجز الحساب الجاري، وفي خلال 9 شهور ولحد 2025، انخفض العجز وسجل 13.2 مليار دولار مقارنةً بـ17.1 مليار دولار في السنة اللي فاتت وده بفضل ارتفاع تحويلات المصريين بالخارج، بالاضافة الي تحسن واردات السياحة .
الزيادات الكبيرة اللي حصلت من تحويلات المصريين العاملين بالخارج وايرادات قطاع السياحة ساهمت في تعزيز الاحتياطي النقدي الأجنبي واللي وصل مستوى قياسي في 2024 وسجل 46.38 مليار دولار في يونيو، والأصول الأجنبية الصافية حققت مكاسب إيجابية لشهور طويلة بعد فترات طويلة من السلبية والانخفاض وكان السبب فيها هيا بتحويلات المصريين بالخارج بالاضافة الي الصفقات الاستثمارية ودعم صندوق النقد الدولي .
تحويلات المصريين العاملين بالخارج مكانتش لها تاثير ايجابي علي الاقتصاد المصري بس، لا ده كان لها اثر مهم جدا علي المستوى المعيشي للأسر المصرية خصوصا في القري، وساعدت في تحسين ظروف الأُسر وتخفيف الفقر وتحسين التعليم والصحة والظروف المعيشية لاغلب الناس، وده بياكد أن قرار البنك المركزي بتحرير سعر الصرف في مصر بشكل مرن والتخلص من السوق السودا كانت نقطة تحول إيجابية ساهمت في استقرار سعر صرف الجنيه وحسنت ميزان المدفوعات، وعززت الاحتياطي النقدي.
في الوقت الحالي الحكومة بتحاول أنها تحافظ علي اللي حققته من الزيادات الكبيرة في تحويلات المصريين العاملين بالخارج من خلال زيادة وتوسعه التحول الرقمي وخفض التكاليف، وتقديم حوافز مالية إضافية للمغتربين زي شهادات الادخار وبرامج المدخرات طويلة الأجل.
المصدر: بانكير
ملحوظة: مضمون هذا الخبر تم كتابته بواسطة بوابة المصريين في الكويت ولا يعبر عن وجهة نظر مصر اليوم وانما تم نقله بمحتواه كما هو من بوابة المصريين في الكويت ونحن غير مسئولين عن محتوى الخبر والعهدة علي المصدر السابق ذكرة.
