حرص أحمد عاطف فايد على التفاعل مع متابعيه عبر فيس بوك من خلال الإجابة على تساؤلات متابعيه حول برومو مسلسل كارثة طبيعية من خلال بوست بعنوان : "إجابات سريعة على أسئلة بتتسألى كتير منذ نزول برومو كارثة طبيعية  ".

في البداية المسلسل 10 حلقات ... هينزل حلقتين كل يوم أربع بداية من الأربع الجاى بإذن الله  على  WATCH IT، كارثة طبيعية مش مسلسل خيال علمى ولا حدث خارق للطبيعة .. هو قصة واقعية لزوج وزوجة مصريين عاديين بيمروا فجأة بحدث بيشقلب حياتهم تماماً ... والحدث ده ممكن يحصل لأى حد عادى .. وهى إن الزوجة بتحمل فى 5 أطفال مرة واحدة كحالة توائم متعددة ... ودى حالة حصلت كتير بالمناسبة في مصر والعالم كله .. والرقم القياسى المتسجل في مصر لحالات التوائم المتعددة .. هي ست جابت 9 أطفال في بطن واحدة ... واستضافها عمرو الليثى واللقاء موجود على اليوتيوب ( بس محدش يتفرج عشان مانكسبهوش أرباح ).

فين بالطو 2 ؟  ...مبسوط  طبعاً جداً انكو بعد سنتين ونص تقريبا لسة بتسألونى على بالطو 2 فى كل مناسبة ...  بس الحقيقة انا مش عارف مين قال إن فيه بالطو  ... بالنسبالى قصة دكتور عاطف خلصت وماكنتش حابب فكرة إنى أكتب جزء تانى لمجرد إستغلال نجاح الجزء الأول بدون ما يكون فيه حاجة معينة عايزين نقولها من المسلسل ...  وده كمان مكنش رأيي لوحدى .. لأ كان رأى منصة واتشت بردو اللى كانت مقتنعة بكده جداً وكانت ضد إستغلال النجاح ... وكذلك أصدقائى الأعزاء عصام عمر وعمر المهندس كانو بيفكرو بنفس الطريقة دى وده نفس رأيهم.

ثم استكمل حديثه : " أيوة اللى شوفتوه ف البرومو صح .. الأستاذ كمال أبو رية معانا في المسلسل وبقينا أصدقاء جداً (  إعترفتله فى أواخر تصوير المسلسل على حوار إن أنا اللى أكتشفت مسلسل عزمى وأشجان بتاعه هو وفيفى عبده وفضحته  .. بس ده محتاجله بوست منفصل هبقى أحكيلكو قالى إيه خلونا في كارثة طبيعية دلوقتى  ".
ثم تابع : " أول حلقتين بعد بكرة 10 صباحاً ... يعنى تصحوا بدرى متكدرين تفطروا تلاقوا الحلقات موجودة أظن مفيش دلع أسوأ من كده، وفى النهاية أتمنى المسلسل يعجبكو إن شاء الله ومستني بجد الفيدباك  بتاعكو على الوحش قبل الحلو فى المسلسل ".