كتب سليمان النقر

أعرب الإعلامي سيف زاهر عن سعادته بالإنجاز الذي حققه المنتخب المغربي بعد التتويج بلقب كأس العالم للشباب والفوز على الأرجنتين بسهولة وسلاسة جدا في المباراة النهائية لمونديال تشيلي.

قال في تصريحات لبرنامج "ملعب أون" على قناة أون سبورت: "اللي المغرب بيعيشه في كرة القدم ده إعجاز ألف مبروك لزملائنا في المغرب والشارع المغربي والمسئولين ولفوزي لقجع رئيس الاتحاد المغربي".

وعن المقارنة بين مصر والمغرب، أكد: إحنا بنتحرك ولكن بنتحرك ببطء، ولا بد من مشروع واضح ويكون مدته 10 سنين يعرضه هاني أبو ريدة على الرأي العام، ونقفل على نفسنا في حتة الناشئين ومش هنحل في دقيقة واللي بيحصل مسكنات، ومش هنقدر نطور كرة القدم في ثانية لازم نقفل على نفسنا 7 أو 8 سنين ونهتم بقاعدة الناشئين، ونبتدي نبني من تحت زي ما منتخب المغرب عنده منتخب مواليد 2013 بيبدأ يعده، لو مقدرناش نعمل كده مش هنوصل لحاجة".

وتابع: "بعمل مقارنة عشان كلنا نفوق، ناس كتير بتقولك اتحاد الكرة والأندية والإعلام، كله لازم يتجرك مع بعضه، بشرح لحضراتكم بطل أفريقيا في آخر سنتين الأهلي وبيراميدز بيلاعبوا بعض في دوري 2007 النهاردة مباراة المفروض تسفر عن أداء رائع وتعبر عن أداء الكرة المصرية في قطاعات الناشئين، المباراة استمرت 5 دقايق وبقول كده وانا حزين".

واستطرد: "مش يقارن وضع بوضع أنا هنا بخاطب إدارات الأندية، هل ده يصلح؟، 5 دقايق لعب والمباراة تقعد ساعة وربع متكملش!، المباراة استمرت 5 دقايق بعد ما الحكم احتسب ركلة جزاء، نزل الجهاز الإداري و60 دقيقة أو 65 دقيقة المباراة واقفة هل ده يصلح؟، هل ده ينفع تطلع منه ناشئين وهل ده هيودينا في حتة تانية وتالتة ورابعة، كل دي أسئلة بسألها لنفسي".

واختتم: "عندنا إمكانيات وعندنا كورة وموارد بشرية بس محتاجين تنظيم، لكن الأندية عليها دور وخطابي ده للأندية، وما حدث لا يليق بالكرة المصرية، والمشكلة دي حصلت بعد يوم واحد من فوز المغرب بكأس العالم للشباب، هل ده ينفع؟".