يعني إيه شركة عالمية تزود 60 مليون قدم مكعب غاز في يوم واحد؟، والاكتشافات دي هتفرق في حياة المواطن ولا مجرد أرقام على الورق؟، وهل الغاز اللي طالع من غرب البرلس هيقلل الاستيراد فعلًا ولا لسه بدري؟، وليه الشركات الأجنبية رجعت تزود استثماراتها في مصر دلوقتي؟، وإنتاج الغاز الكثيف ده هيأثر إزاي على أسعار الكهرباء والصناعة؟
كنز جديد من تحت الأرض، مش دهب ولا آثار، ده غاز طبيعي بملايين الدولارات، وبيأكد أن مصر لسه عندها كتير قوي تقدمه في ملف الطاقة.
شركة كايرون بتروليوم العالمية أعلنت عن إضافة جديدة قوية لإنتاج الغاز في مصر، بعد ما قدرت تزود حوالي 60 مليون قدم مكعب غاز يوميًا مرة واحدة، وده حصل مع بداية يناير 2026 من مناطق امتيازها في غرب البرلس بالبحر المتوسط.
اللي حصل ببساطة أن الشركة خلصت ربط بئرين جديدتين على شبكة الإنتاج، البئر الأولى بتنتج حوالي 35 مليون قدم مكعب يوميًا، والبئر التانية حوالي 25 مليون قدم مكعب، يعني إجمالي 60 مليون قدم مكعب غاز يوميًا داخلين على الشبكة القومية، وده رقم مش قليل خالص.
الكنز ده اتكلف كام؟.. الاستثمارات اللي اتحطت في حفر وربط البئرين دول وصلت لحوالي 100 مليون دولار، وده بيعكس قد إيه الشركات العالمية شايفة أن الاستثمار في الغاز المصري لسه مجزي ومربح، خصوصًا في مناطق المياه العميقة في البحر المتوسط.
كايرون مش شغالة بس في حفر آبار وخلاص، دي الشركة مشاركة كمان في تطوير حقول الغاز البحرية، وتحديث المنصات ومد خطوط الأنابيب البرية والبحرية وكل ده بهدف واحد، وهو تعزيز الإنتاج المحلي وتقليل الاعتماد على الاستيراد.
نقطة مهمة جدًا هنا، وهي أن تعديل أسعار الغاز المنتج من الآبار الجديدة من قِبل الهيئة المصرية العامة للبترول وشركة إيجاس، كان له دور مباشر في تشجيع كايرون وغيرها من الشركاء الأجانب إنهم يزودوا استثماراتهم ويرفعوا معدلات الإنتاج، وده يوضح قد إيه السياسات المرنة بتفرق في جذب الاستثمار.
ولو بصينا على الصورة الأكبر، هنلاقي أن ملف الغاز في مصر شغال بقوة من 2024 لحد دلوقتي.
في حقل ظهر لوحده، إنتاج بئري ظهر 6 وظهر 9 وصل لحوالي 135 مليون قدم مكعب غاز يوميًا.. وفي غرب الدلتا العميق، آبار المرحلتين 10 و11 بتنتج حوالي 305 ملايين قدم مكعب غاز يوميًا، غير 3600 برميل متكثفات بترولية.
حقل ريفين في البحر المتوسط كمان دخل بإنتاج قوي من بئرين جداد بحوالي 140 مليون قدم مكعب غاز يوميًا، وفي الصحراء الغربية بئر جنوب Nut1 سجل 50 مليون قدم مكعب غاز يوميًا.
كمان في خطة لرفع إنتاج حقل البرلس من 45 لـ 75 مليون قدم مكعب غاز يوميًا مع بداية السنة الجاية، وده هيكون إضافة مهمة جدًا للشبكة، أما شركة خالدة، فإنتاجها من الاكتشافات الجديدة وصل لـ 36 مليون قدم مكعب غاز يوميًا، وكمان آبار تانية بتنتج أكتر من 3550 برميل بترول خام يوميًا بجانب الغاز.
كل الأرقام دي بتقول حاجة واحدة، أن الغاز لسه ورقة قوة حقيقية في إيد مصر، وإن الاستثمارات اللي بتدخل القطاع مش صدفة، لكنها مبنية على اكتشافات حقيقية، وسياسات تشجيع، وبنية تحتية اتبنت على مدار سنين.
ملحوظة: مضمون هذا الخبر تم كتابته بواسطة بوابة المصريين في الكويت ولا يعبر عن وجهة نظر مصر اليوم وانما تم نقله بمحتواه كما هو من بوابة المصريين في الكويت ونحن غير مسئولين عن محتوى الخبر والعهدة علي المصدر السابق ذكرة.
