كشفت غادة عبد الرازق خزانة أسرارها خلال لقاء لها مع الإعلامية لميس الحديدي وتحدثت عن أزماتها المادية وكيف أثر عدم استقرارها النفسي على زيجة ابنتها روتانا، كما تحدثت النجمة المصرية عن زيجاتها ووصفت اختياراتها بالخاطئة.

سبب عدم قدرتها التمثيل أمام أحمد ماهر

تطرقت غادة عبد الرازق في لقائها للحديث عن سر عدم قدرتها التمثيل أمام الفنان أحمد ماهر حيث قالت: "الحقيقة إن أستاذ أحمد مدرسة إلقاء الألفاظ واللغة العربية، كمان هو  عنده رتم عالي موت، يعني وهو بيلقي في الحقيقة تحسي إنه هو لا يتحدث طبيعي مثلنا.. بعدين أنا اكتشفت أن إحنا عندنا مدرسة في التمثيل فاشلة شوية وهي التلقائية، المدرسة دي تنفع في أدوار معينة، وفي أعمال معينة لكن هي مش حقيقي أنها مقياس التمثيل زي ما بيقولوا، التلقائية دي مدرسة إحنا اختراعها أو ظهرت حديثا، لكن الحقيقي إن التمثيل هو مدرسة تقيلة جدا وأنا اتعلمت منها واكتشفت إن أنا ماشية ورا سراب فلازم أرجع للصح".

وتابعت الفنانة المصرية موضحة سبب عدم قدرتها التمثيل أمام أحمد ماهر: "لما جيت وقفت قدام أحمد ماهر أمثل كان عندي مشكلة، إن أنا من مدرسة التلقائية اللي بتكلم عنها وهو من المدرسة التقيلة، فلما بيجي هو يقول حاجة أنا مبعرفش وغصب عني بروح لمنطقة عالية أوي، أنا مكنتش عارفة أجيب الأداء منين طبعاً".

معاناة غادة عبد الرازق مع المرض النفسي

لا تخجل غادة عبد الرازق من الحديث عن تجاربها مع الطب النفسي وكيف حاولت مواجهة أزماتها النفسية، فتقول خلال لقائها مع الإعلامية لميس الحديدي: "أنا معنديش استقرار نفسي، أنا ست مريضة من 35 سنة، يعني خلينا نكون متفقين مينفعش حد يقولي ‏استقرارك النفسي، لأني  في الأساس معنديش لا استقرار نفسي ولا عاطفي ولا أي استقرار أصلاً".

هل كانت السبب في انفصال ابنتها

أما عن انفصال ابنتها روتانا فقالت غادة عبد الرازق في تصريحاتها: "عدم الاستقرار النفسي ده أوقات بحس أنه كان سبب إني دمرت ناس تانية لأن في يوم من الأيام مثلاً بنتي دي كان عندها استقرار في بيتها  بعدين  انفصلت وممكن من بين الاحتمالات أكون أنا السبب وقصرت في هذا الجانب.. لأن خلينا نكون واضحين كل راع مسؤول عن رعيته وروتانا أعتبر نفسي الراعي بتاعها لأنها منذ طفولتها وهي  مرتبطة بيا مش مستقلة، يعني مكانش مثلا معاها بيت مع والدها".

سبب حسد غادة عبدالرازق للآخرين

اعترفت غادة عبدالرازق بأنها في بعض الأوقات تحسد الآخرين على استقرارهم موضحة: "الممثل مننا  أول ما ‏بيبدأ طريقه بتكون رغبتنا النجاح والشهرة والماديات، كل دول طبعاً بتوصلهم عن طريق واحد، الطريق ده  في الحقيقة ‏أخذ مني حاجات ثانية كثيرة أوي قصادها، لما بشوفها في ناس ثانيين بحسدهم عليها، بحسدهم طبعا ‏على الاستقرار والبيت والزوج والأطفال، وكل حاجة أنا ضاعت مني في طريقي للتمثيل". ‏

 كيف تواجه  غادة عبد الرازق أزماتها؟

وعن تعاملها مع أزماتها النفسية وأوقات الضعف التي تمر بها قالت غادة عبدالرازق: "أنا لما بتكسر محبش حد يشمت فيا أبدا فبختفي تماماً، أنا عموما ست بيتوتية جداً فتلاقيني مختفية ‏طول الوقت، لكن في لحظة الانكسار بختفي بقى أكثر..  وفيه حاجات كتير بتكسرني زي البني آدمين مثلاً، أو فشل في الشغل، أو أعداء ممكن يحاربوني، أو حاجة تمس ‏بنتي أو أهلي، حاجة تشوه سمعتي، خيانة، أزمة مادية؛ كل دي حاجات طبعاً ممكن  تكسرني".

أزمات غادة عبدالرازق المادية

كما كشفت غادة عبد الرازق عن تعرضها في بعض الأوقات لأزمات مادية قائلة: "بتعرض طبعاً لأزمات مادية زيي زي أي حد.. أنا التزاماتي كبيرة آوي، وربنا بيدي كل بني آدم على قد ‏التزاماته، ولما بفشل في عملي طبعا ده بيأثر على التزاماتي".‏

زيجات غادة عبد الرازق

واعتبرت غادة عبد الرازق أن اختياراتها للرجال في حياتها ليست جيدة وردت على سؤال للميس الحديدي بهذا الشأن قائلة: "شوفي أنا كل اختياراتي في الرجالة كانت غلط وعمري ما اخترت راجل صح في حياتي  باستثناء والد روتانا بنتي طبعاً، لكن بقية الاختيارات طبعا  لم تكن صحيحة، فيه منهم منحني ماديات والبعض الآخر حفلات، وفيه منهم أداني حب، وحاجات كتيرة جدًا،  لكن انا عمري ما اعتمدت على حد منهم طول عمري سند نفسي".

سر حفاظ غادة عبدالرازق على وزنها

وعن سر احتفاظها برشاقتها قالت غادة عبدالرازق إنها طالما قررت الاستمرار في التمثيل والنجومية فمن الضروري أن تحافظ على قوامها واختيار أزيائها وأضافت: "طول ما انا بمثل يبقى لازم شكلي وجسمي يكون شكلهم حلو وأعرف اختار لبسي، بس يوم ما أخد القرار إني أعتزل الفن وأقعد في البيت، ساعتها لو عايزة أتخن أو ماخدش بالي من شعري ووشي وأعمل اللي عاوزاه، هعمله،  لكن طول مانا نجمة يبقى لازم أحافظ على صورة النجمة عند الناس".